Змейкæйы аразынц ног скъола 360 бынатимæ

Бетон блоктӕ, ӕндон арматурӕ ӕмӕ агуыридуры рӕдзӕгъдтӕ – ахæм хуызы ныртæккæ ис Змейкæйы станицæйы фыццæгæм скъола. Кусæндонæн райдайдзæн йæ историйы ног сыф: зæронд бæстыхай фехӕлдтой бындуры онг, уымӕн ӕмӕ йӕ дарддӕры эксплуатацийӕн фадат нал уыд.  Электрон тыхы телтимæ æппынæдзух къуылымпыдзинæдтæ, кабинеттæ — чысыл æмæ æвадат. 350 скъоладзауы ахуыр кодтой 15 къласы – аудиторитæ цæттæ нæ уыдысты. Уæлæмхасæн агъуыстытæй сарæзтой ахуыргæнæн бынæттæ, фæсивæды арæх цæуын хъуыд сыхаг аивадон скъоламæ, хӕрӕндоны бӕсты та хаццоны ист бæстыхай. Ныр бынтон ӕндӕр уавӕртӕ ӕнхъӕлмӕ кӕсынц сывӕллӕттӕм.  Алцыдæр фаг уыдзӕн: ног скъола сырӕздзӕн ӕртӕ уӕладзыджы онг, бынат дзы фæзындзæн 360 ахуыргӕнинагæн. Кусæндон ифтонггонд уыдзæн нырыккон фæрæзтæй ӕмӕ мебелæй. Ахӕм ногдзинадмӕ Змейкӕйы ӕнхъӕлмӕ кастысты 50 азы — кабинеттӕ нӕ фаг кодта ивгъуыд ӕнусы 70-ӕм азтӕй фӕстӕмӕ. Ахуыргӕнджытӕ зæгъынц: сӕ зӕрдӕ дардтой бындурон цалцӕгыл, фæлæ уынынц ӕххӕст рацарӕзт. Фӕлӕ кæронбæттæн къæпхæн нырма дард у: аразджытӕ фесты ӕрмӕст райдиан куыстытæ - разӕй фыццаг уӕладзыджы амад ӕмӕ цæджындзты монтаж. Фӕзыл ныртӕккӕ фӕллой кӕнынц 10 адӕймагӕй фылдӕр. Объект фӕуынмӕ хъавынц фидæны азы кӕронмӕ. Дыккаг корпусы кæронмæ фæхæццæ кæнынц райдиан куыстытæ. Цæттæ кæнæм цæджындзтæ, æвæрæм плитатæ, къуыри фæстæ ма фæнд кæнæм бындур æвæрын райдайын спортивон залæн æмæ хæрæндонæн. Ахӕм ногдзинӕдтæ бынæттон цæрджытæн æхсызгон сты. Станицӕйы æрмæст дыууӕ скъолайы ис. Сæ уавæртæм — сӕрмагонд цӕстдард. Ахуыргæнæндон ног хуыз райсдзӕн национ проект "Фӕсивӕд ӕмӕ сывӕллӕттӕ"-йы фӕлгӕты.