Абон йæ цардæй ахицæн режиссер Георгий Данелия

Абон йæ цардæй ахицæн хъуыстгонд режиссер Георгий Данелия дæр. Цыдис ыл 88 азы. Рынчындонмæ бахауд февралы, йæ рæуджытæй сæйын кæй райдыдта, уый аххосæй. Суанг ма йæ дохтыртæ реанимацион хайады дæр сæвæрдтой. Фæлæ адзал тыхджындæр разынд. Георгий Данелия райгуырд Гуырдзыстоны. Афæдз ыл куы рацыд, уæд бинонтæ ралыгъдысты Мæскуымæ. Ивгъуыд æнусы 50-æм азты Георгий Данелия каст фæцис Мæскуыйы архитектурон институт, куыста горæтты проектты Институты. Фæлæ йын хъысмæтæй цы фæндаг нывонгонд æрцыд, уый йæ æрæййæфта. 1959-æм азы Данелия каст фæцис «Мосфильм»-ы цур режиссеры уæлдæр курсытæ. Кино исыны сусæгдзинæдтæ иучысыл куы базыдта, уæд кусын райдыдта киностудийы режиссер-æвæрæгæй. Афæдзы фæстæ та рухс федта йæ фыццаг киноныв «Сережа», зæгъгæ. Ахæм æнтыстджын рауад, æмæ ма йын Æппæтдунеон кинофестивалы Гран-При дæр саккаг кодтой. Æцæг хъуыстгонд та Георгий Данелия ссис 1964 азы. Уæд ын адæм федтой йæ киноныв «Я шагаю по Москве». Фæстæдæр ма йе сфæлдыстадон æнтыстыты номхыгъдыл бафтыд. Адæмы рæгъмæ рахаста ахæм кинонывтæ, куыд «Тридцать три», «Не горюй», «Совсем пропащий», «Афоня», «Мимино» æмæ «Кин-дза-дза». Æндæр режиссертимæ ма куыста цалдæр кинонывыл, ахъазыд цалдæр чысыл ролы. Георгий Данелия у Советон Цæдисы адæмон артист, Советон Цæдисы Паддзахадон премийы лауреат, æнæнымæц хæрзиуджытæ дарæг. Райста ма «Фыдыбæстæйы цур сгуыхтыты» тыххæй 2-æгæм æмæ 3-æгæм къæпхæнты орден дæр. _ Мы рядом в: vk.com/irystontv instagram.com/irystontv https://youtube.com/irystontv twitter.com/irystontv ok.ru/irystontv