Майаҕа Амма күннэрэ. "Эн кэлээр Аммаҕа" уус-уран кэнсиэр, быыстапка түгэннэрэ. 09.04.2025

Муус устар 9 күнүгэр Майа сэлиэнньэтигэр доҕордуу Амма нэһилиэгин айар талааннаах дьоно Д.Ходулов аатынан Култуура киинигэр Майа сэлиэнньэтин олохтоохторун иннигэр «Эн кэлээр Аммаҕа» кэнсиэри туруордулар. Биллэриллибитин курдук, күнүс 14 чаастан фойеҕа Амма норуотун маастардарын уус-уран оҥоһуктарын быыстапката туруоруллубута, атыы-эргиэн дьаарбаҥката тэриллибитэ. Майалар көхтөөхтүк кэлэн эт-үүт ас арааһын, ыыһаммыт эти, халбаһыыны хото атыыластылар. Фитобородууксуйа дьон болҕомтотун тарта. 19 чаастан кэнсиэр иннинэ көрөөччүлэри сахалыы сиэринэн быырпаҕынан, алаадьынан, нууччалыы сиэринэн каравайынан айах туттулар, «Кыл кылыһах» фольклорнай ансаамбыл тыыннаах дорҕоонунан, тойугунан эҕэрдэлии көрүстүлэр. Кэнсиэр саҕаланыытыгар Майа сэлиэнньэтин баһылыга Алексей Иннокентьевич Неустроев уонна Амма нэһилиэгин баһылыга Михаил Алексеевич Артемьев эҕэрдэ тылларын тиэртилэр, хардарыта бэлэх туттардылар. Кэнсиэргэ кыттыыны ылбыт Амматааҕы 1№-дээх орто оскуола үҥкүүтүн кэлэктиибигэр, «Күндүл» үҥкүү ансаамбылыгар, «Кыл кылыһах» фольклорнай ансаамбылга, «Үрдэл», эр дьон, лицей вокальнай ансаамбылларыгар, ансаамбыллар салайааччыларыгар, биирдиилээн толорооччуларга: Елизавета Макароваҕа, Александр Ушницкайга, Николай Нестеровка, Анна Матвееваҕа, Ксения Татариноваҕа, Михаил Артемьевка, Валерий, Диана Кириллиннарга, Амматааҕы Федот Потапов аатынан норуот айымньытын дьиэтин кэлэктиибигэр, дириэктэргэ Петр Алексеевич Кулаковскайга, уус-уран салайааччыга Фекла Петровна Санниковаҕа махталбытын уонна эҕэрдэбитин тиэрдэбит. Айар талааҥҥыт өссө да сайда турдун, сайдыы аартыктара арыллан истиннэр. Көрсүөххэ диэри!