Майаҕа "ТААЛА КҮӨЛ" саҥа хаар паркатыгар өрөспүүбүлүкэтээҕи хаартан оҥоһук күрэҕэ (24-25.02.2024)

Майа сэлиэнньэтигэр 2024 с. олунньу 24-25 күннэригэр «Дьоллоох оҕо саас» диэн дьиэ кэргэн икки ардыгар аһаҕас өрөспүүбүлүкэтээҕи хаартан оҥоһук күрэҕэ буолан ааста. Манна өрөспүүбүлүкэ араас муннуктарыттан ол курдук Муома, Таатта, Нам, Мэҥэ-Хаҥалас улуустарыттан уонна Дьокуускай куораттан уопсайа 17 хамаанда дьиэ кэргэн, аймах кыттыыны ыллылар. Үлэ ис хоһооно Россияҕа дьиэ кэргэн, Өрөспүүбүлүкэҕэ оҕо саас, улууска тыа хаһаайыстыбата, Майа сэлиэнньэтигэр чөл олох сылларыгар тирэҕирэн Аан дойду ойуулуктар дьоруойдарыттан хаар оҥоһуктары оҥортоотулар. Майа сэлиэнньэтин дьаһалтата уонна паарка хаһаайына Петр Петухов эрдэттэн хаар макыаттарын бэлэмнээн кыттааччыларга усулуобуйа оҥорон ыалдьыттары көрүстүлэр. Икки күн устата кыттааччылар итии аһынан, ыраахтан кэлбит дьоннорбут хонор сиринэн хааччылыннылар. Аан дойду ойуулуктарыттан оҥоһуллубут дьоруойдар киһини сөхтөрөр, сүрдээх үрдүк хаачыстыбалаахтык оҥоһулуннулар. Хаар оҥоһуктар саҥа хаар пааркабытын киэргэтиэхтэрэ. Дьүүллүүр сүбэҕэ Алексей Иннокентьевич Неустроев - Майа сэлиэнньэтин аҕа баһылыга, Архип Николаевич Скрябин - норуоттар икки ардыларынааҕы күрэх элбэх төгүллээх кыайыылааҕа, Светлана Петровна Чирикова - улуустааҕы култуура салалтатын дизайнера, СӨ култууратын туйгуна үлэлээтилэр. Сыанабыл толкуйдатар соҕус буолла диэххэ наада, оҥоһуктар бары да үчүгэйдэр, ол да буоллар биир түмүккэ кэллилэр. Күрэх быыһыгар Архип Скрябин маастар кылаас быһыытынан астарыллыбыт хаар модьоҕотуттан сүүрэн иһэр 12 төбө биир үөр сылгы тыыннаах истиэнэтин оҥорон көрдөрдө. Дьиэ кэргэн 2 күннээх үлэтин түмүгүнэн дьүүллүүр сүбэ быһаарыытынан: 1-кы миэстэни Васильевтар дьиэ кэргэн (Дьокуускай к.) – 30 тыһыынча солк., 2-с миэстэни Петуховтар дьиэ кэргэн (Майа сэл.) – 20 тыһыынча солк., 3-с миэстэни Аргуновтар дьиэ кэргэн (Нам улууһа) – 10 тыһыынча солк. уу харчынан, мэдээлинэн, кубогынан уонна хаалбыт 14 хамаандаларга 3-түү тыһыынча солкуобайдаах уу харчынан наҕараадаланнылар. Күрэх кыттыылаахтарыгар барыларыгар туоһу суруктар туттарылыннылар. Ону таһынан успуонсардар туруорбут анал бириистэрэ туттарылынна: Бадаайы, Промкомбинат түөлбэлэр 5000-тии тыһыынча солк., "Баарт" маҕаһыын күлүүс набора, "Камила 2" маҕаһыын 3000 солк. сэртипикээт, М.К.Попова аатынан оҕо ускуустубатын оскуолата 3000 солк. сэртипикээт уонна Саха көрдөрөр иһитиннэрэр хампаанньата 10000 солк. сэртипикээт. Тэрээһини өйөөбүт тэрилтэлэрбитигэр МАХТАЛБЫТЫН биллэрэбит! Ыраахтан кэлбит Нам, Таатта, Муома улууһун ыалдьыттарыгар Майа сэлиэнньэтин аҕа баһылыга Алексей Неустроев 2 томнаах Майа сэл. остуоруйатын кэрэһэлиир кинигэтин бэлэх уунна. Кыттааччылар махтанан, үөрэн-көтөн, уопут атастаһан , дуоһуйан тарҕастылар #Майаолохтоохдьаһалтата #Майаҕачөлолохсыла #Чөлтуруктаахмайа Майа сэл. олохтоох дьаһалтата