Чаҕылҕаны ааҕабыт, Чаҕылҕаны туойабыт!

Үтүө үгэс быһыытынан, сыл ахсын Үрүҥ тунах ыһыах программатыгар киллэрэн Н.М. Рыкунов аатынан киин модельнай библиотека дьоһун, биллиилээх дьоммут ааттарын үйэтитэн уус-уран ааҕыы күрэҕин ыыталлар. Ол курдук, бэс ыйын 16 күнүгэр Нам улууһугар «Чаҕылҕаны ааҕабыт, Чаҕылҕаны туойабыт!» уус-уран ааҕыы күрэх Эҥсиэли хочото-айар кут түһүлгэтигэр буолан ааста. Күөн-күрэс ССРС Суруйааччыларын сойууһун чилиэнэ, биллиилээх бэйиэт, тылбаасчыт Илья Дорофеевич Винокуров-Чаҕылҕан төрөөбүтэ 110 сылыгар ананна. Күрэх тэрийээччилэринэн үлэлэстилэр Нам улууһун культураҕа уонна духуобунаска салалтата, Намнааҕы кииннэммит библиотека тиһигэ уонна Хатыҥ-Арыы нэһилиэгин «Чороон» культурнай сынньалаҥ киинэ. Уус-уран ааҕыыга Илья Чаҕылҕан хоһооннорун дорҕоонноохтук өйтөн этиигэ уопсайа биирдиилээн бөлөххө улахан уонна ыччат дьоҥҥо барыта 17 киһи кытынна, ону таһынан бөлөҕүнэн ааҕыыга икки. Күрэс икки көрүҥүнэн ыытылынна: — биирдиилээн уус- уран ааҕыы; — бөлөҕүнэн уус — уран ааҕыы.