Майатааҕы народнай Эдэр көрөөччү театра 26-с театральнай сезонун 3 испиктээгинэн түмүктээтэ

Быйыл, Майатааҕы народнай Эдэр көрөөччү театра 26-с театральнай сезона Улуу Кыайыы 80 сылыгар ананна. Сезону түмүктүүр киэһэҕэ маҥнайгынан Чингиз Айтматов «Солдатенок» айымньытынан турбут «Саллаат оҕото» испиктээк көрдөрүлүннэ. Сүрүн бөлөххө туруоруллубут испиктээк быйыл кэккэ ситиһиилэннэ. Ол курдук, 8-с өрөспүүбүлүкэтээҕи «Алыптаах мааска» народнай театрадар бэстибээлигэр Майатааҕы народнай Эдэр көрөөччү театра бу испиктээгинэн кыттан сүрүн оруолу толорбут Костя Слепцов «Бастыҥ эр киһи » оруола анал аатынан бэлиэтэммитэ, ону тэҥэ «Бастыҥ звукооператор үлэтэ» анал ааты ылбыта. Онтон саас ыытыллыбыт 29-с өрөспүүбүлүкэтээҕи Ю.Козловскай аатынан «Синяя птица» оскуола театрдарын бэстибээлигэр «Бэстибээл эрэлэ» ааты ылбыта. Костя ТЮЗка кыра эрдэҕиттэн дьарыктанар. Билигин кини В.П.Ларионов аатынан Майа орто оскуолатыгар 5 кылааска үөрэнэр. Иккиһинэн, ненец омук остуоруйатыгар олоҕурбут «Кэҕэ» испиктээги И.Г.Тимофеев аатынан Майатааҕы лицей 5 кылааһын үөрэнээччилэрэ көрдөрдүлэр. Кинилэр ТЮЗка бу күһүҥҥэттэн дьарыктаналлар. Испиктээги олус итэҕэтиилээхтик толорбуттарын көрөөччүлэр биһирээтилэр. Оҕолор өссө да сайдан-үүнэн иһиэхтэрэ диэн итэҕэйэбит. Түмүккэ, И.Г.Тимофеев аатынан Майатааҕы лицей араас кылаастарын үөрэнээччилэрин толорууларыгар Сахалартан бастакы Сэбиэскэй сойуус Дьоруойа – Федор Кузьмич Попов сырдык кэриэһигэр анаммыт «Тыыннаах сулус» испиктээк көрөөччү дьүүлүгэр таҕыста. Испиктээккэ И.Г.Тимофеев аатынан Майатааҕы лицей бары кэриэтэ кылаастара кытыннылар. Бу туруоруу – оҕолор историяны билэллэригэр туһуламмыт анал бырайыак буолар. Бүгүҥҥү күҥҥэ 3 испиктээккэ холбоон 152 оҕо кытынна. Испиктээктэргэ кыттыбыт бары оҕолору, кинилэр төрөппүттэрин, учууталларын, режиссер Александра Семеновна Скрябинаны итиитик-истиҥник эҕэрдэлиибит!