Т.И. Замятин төрөөбүтэ 95 сылыгар аналлаах III улуустааҕы Замятинскай ааҕыылар түмүктэрэ.

Эриэккэс сирдэрбит сурукка тиһиллэн Бэртээхэй дьоннорбут бэлиэҕэ ылыллан, Билиҥҥи ыччакка холобур буоллулар, Улууга-кэрэҕэ угуйа турдулар... Т.И. Замятин Нам улууһа киэн, тумус туттар киһитэ, РФ үтүөлээх экономиһа, СӨ тыа хаһаайыстыбатын үтүөлээх үлэһитэ, кыраайы үөрэтээччи, Нам улууһун бочуоттаах киһитэ, «Отуу уота» литературнай түмсүүнү тэрийсибит Терентий Иванович Замятин ахсынньы ый 6 күнүгэр төрөөбүтэ 95 үбүлүөйдээх сылын туолбута. Н. М. Рыкунов аатынын киин библиотека Т.И. Замятиҥҥа аналлаах араас ис хоһоонноох тэрээһиннэри ыытта. Ол курдук Никольскай нэһилиэгин алын сүһүөх оскуолатын уонна Никольскайдааҕы И.С. Шарапов аатынан сири туһаныы музейын кытта холбоһон үтүө киһибит Терентий Иванович Замятин 95 сыллаах үбүлүөйдээх сылын чэрчитинэн, кини сырдык аатын үйэтитээри уонна улууспут историятыгар болҕомтону уураары сэтинньи ый 12 күнүттэн-ахсынньы ый 12 күнүгэр диэри «Ыччаттарбар кэс тылым» диэн куйаар ситимин нөҥүө Замятинскай ааҕыы буолла. Ахсынньы ый 17 күнүгэр куйаар ситимин нөҥүө ыытыллыбыт «Ыччаттарбар кэс тылым» Замятинскай ааҕыы түмүгүн ZOOM платформаҕа таһаардыбыт. «Ыччаттарбар кэс тылым» диэн куйаар ситимин нөҥүө Замятинскай ааҕыы Терентий Иванович биир кинигэтин аатынан ааттаабыппыт, кини эппит тыллара күн бүгүн да тирэхтээхтэр, силистээхтэр. «Мин эһиги эбээлэргит, эһээлэргит, ийэлэргит-аҕаларгыт ханнык кэмҥэ, хайдах олорон кэлбиттэрин табатык өйдөөтүннэр диэн суруйдум. Бу ыарахан рынок төһө уһуннук барара биллибэт. Баҕар уһуон сөп. Маннык түбэлтэҕэ өй-санаа өттүнэн, кыаллар буоллаҕына материальнай да өттүнэн өйөтөр чугас да, ыраах да буоллар тирэх буолар дьоннордоох буолар наада» диэн кинигэтигэр суруйбут. Ааҕыы түмүгүн Никольскай нэһилиэгин алын сүһүөх оскуолатын директора Марфа Ивановна Шадрина сиһилии кэпсээн таһаарда. Ааҕыы сыалынан-соругунан төрөөбүт түөлбэнэн, биллэр-көстөр биир дойдулаахтарбытынан киэн туттуу, үйэтитии, нэһилиэнньэҕэ тарҕатыы буолар. Замятинскай ааҕыы түөрт хайысханан ыытыллыбыта: Бастакы хайысха: «Хочом дьонугар аныыбын» - (Т.И. Замятин хоһоонноруттан сөбүлээбит айымньыгытын өйтөн эбэтэр кинигэттэн көрөн туран дорҕоонноохтук ааҕан биирдиилээн эбэтэр бөлөҕүнэн видеоҕа устан ыытаҕыт); Иккис хайысха: «Дойдум дьоно, төрөөбүт төрүт түөлбэм» улуус нэһилиэктэрин историята, кыраайы үөрэтээччилэри, нэһилиэк киэн туттар дьонун олохторун, үлэлэрин туһунан кэпсээһин Үһүс хайысха: «Дойду сурахтаах, алаас ааттаах” - төрөөбүт дойду топонимиката (сир-уот ааттарын үөрэтии) Төрдүс хайысха: «Өбүгэм туһунан иһирэхтик” - төрүччү (саха киһитэ бэйэтин төрдүн-ууһун, кини иннинэ олоро сылдьыбыт өбүгэлэрин, биллэр-көстөр, бэлиэ буолбут сатабылларын, өйгө-санааҕа хаалар уратыларын чинчийии) Бары Замятинскай ааҕыыга кыттыыны ылбыт, спонсорскай көмө оҥорбут дьоммутугар: «Ленскэй нэһилиэк” МТ – баһылык Андрей Григорьевич Новгородов, “II Хомустаах нэһилиэгэ” МТ – баһылык Лев Николаевич Новгородов, “Никольскай нэһилиэгэ” МТ – баһылык Кривогороницын Алексей Карлович, “Никольскай нэһилиэгэ” МТ тэрилтэлэрэ уонна общественнай түмсүүлэрэ, “Олох-дьаһах коммунальнай хаһаайыстыбатын” тэрилтэтэ-директор Николай Васильевич Игнатьев, Ипподром түөлбэтэ – салайааччы Осипова Татьяна Ивановна, улуустааҕы культура үлэһиттэрин идэлээх Сойуустарын кэмитиэтэ –председатель Парникова Александра Алексеевна махтал истиҥэ буоллун. РФ үтүөлээх экономиһа, СӨ тыа хаһаайыстыбатын үтүөлээх үлэһитэ, кыраайы үөрэтээччи, Нам улууһун бочуоттаах киһитэ, «Отуу уота» литературнай түмсүүнү тэрийсибит Терентий Иванович Замятин «Ыччаттарбар кэс тылым» диэн кинигэтигэр суруйбут тылларынан Замятинскай ааҕыыны түмүктүүбүт «Күннэр-дьыллар, сыллар хаһан да биир сиргэ турбаттар, биллибэтинэн ааһан иһэллэр. Ол аайы дьон-норуот олоҕо, дьылҕата, кинилэр баҕаларыттан тутулуга суох уларыйан иһэр. Дьэ, ол иһин эһиэхэ өссө төгүл этэбин, олох хаамыытын эһиги аныгы үөрэхтээх дьон быһыытынан, куруук кэтээн көрөргүт, үөрэтэргит наада диэн» Терентий Иванович Замятин бу суруйбут тыллара биһиги олохпутугар күн бүгүн да тоҕоостоохтор. Оҕолорго өрүүтүн бу курдук үлэҕэ, олоххо бэлэм дьон иитиллэн тахсыҥ диэн баҕа санаабытын этэбит. Кыраайы үөрэтээччи Терентий Иванович Замятин төрөөбүт улууһугар кэмнэммэт сыаналаах үлэни оҥорбута сыл-хонук барарын тухары умнуллуо суоҕа.