«Капля жизни» ужрад ортчиз Ижкарын

3-тӥ куарусёнэ Ижкарысь Вормон скверын «Капля жизни» огъяросси акци ортчиз. Со Терроризмен нюръяськонын огазеяськон нуналлы тупатэмын вал. Митинге школаын дышетскисьёс, кадетъёс, мер но лулчеберъя йӧскалык огазеяськонъёслэн ёзчиоссы люкаськизы. Кипыдэсазы ву омыртыса, соос сяськаосты кисьтазы. Озьы 2004-тӥ арын 1-3 куартолэзе Бесланысь школаын террористъёс киулын куинь нунал сиытэк-юытэк пукем пиналъёсты, анай-атайёссэс но дышетӥсьёсты буре вайизы. «Со кышкыт учыр Россиын улӥсьёслэн сюлэмъёсазы бурмисьтэм яра кадь. 334 адями быриз (пӧлазы 318 заложникъёс – ред.), соос пӧлын 186 нылпи. Со пиналъёслэн улонзы куспетӥ луиз, соос ӧз адӟе та дуннеез, ӧз вуттэ эшъяськонзылы шумпотыса. ﹤…﹥ Асьмелэн тодэ вайылонмылэн пумыз ӧвӧл. Адӟемпотостэм карон кунамы улӥсьёсты люкыны уз быгаты, малы ке шуоно асьмеос кусыпъёсмес эшшо юн кариськом. Кужыммы зэмзэ но огъя луонын. Милям, бадӟымъёслэн, ужпуммы – тыршыны, тӥляд вуоноды ӟеч мед луоз шуыса», – вераз Удмуртилэн Кун Кенешысьтыз ужъя, мерлыко политикая но ветеранъёслэн ужпумъёссыя ялан ужась ӧрилэн кивалтӥсез Елена Дербилова. Люкаськемъёс озьы ик мукет интыосын, со пӧлын Ижкарысь 88 номеро школаын шуэрес учырын но, быремъёсты буре вайизы, Ож но уж данлыкъя синпелет доры сяськаос понӥзы.