Аубекир Шинахов сси химийæ скъоладзауты æппæтуæрæсеон олимпиадæйы кæронбæттæн къæпхæны призер

Республикон физикон-математикон лицейы 10-æм къласы ахуырдзау Аубекир Шинахов сси химийæ скъоладзауты æппæтуæрæсеон олимпиадæйы кæронбæттæн къæпхæны призер. Абон уæлахиздзауыл вокзалы сæмбæлдысты йæ хиуæттæ æмæ хæлæрттæ. Интеллектуалон ерыстæ цыдысты «Сириусы» 23-æм мартъийæ 1-æм апрельмæ. Жюрийы уæнгты ныхæстæм гæсгæ, ацы аз хæслæвæрдтæ ноджы зындæр уыдысты. Ахуырдзау куыд радзырдта, афтæмæй æппæтуæрæсеон къæпхæныл хуыздæр разыныны бар дæтты бæстæйы хуыздæр университетмæ бахауынæн. Æвзонг лæппу фæнд кæны Мæскуыйы паддзахадон университетмæ бацæуын. Уыимæ йæ æнтыстдзинæдтыл æрлæууынмæ нæ хъавы: дарддæр ног олимпиадæтæ æмæ бæстон цæттæгæнæн рæстæг.